सामाजिक

🟦 आगरकर जयंतीनिमित्त राज्यस्तरीय पुरस्कारांचा गौरव सोहळा ✍️ १४ जुलैला कराडमध्ये मान्यवरांचा सन्मान; पत्रकारिता, समाजपरिवर्तन व वैचारिक कार्याचा होणार गौरव,

मुख्य संपादक - भाग्यवंत नायकुडे 3 months ago 1 minute read

🟦 आगरकर जयंतीनिमित्त राज्यस्तरीय पुरस्कारांचा गौरव सोहळा

✍️ १४ जुलैला कराडमध्ये मान्यवरांचा सन्मान; पत्रकारिता, समाजपरिवर्तन व वैचारिक कार्याचा होणार गौरव,

अकलूज वैभव न्यूज नेटवर्क
कराड/प्रतिनिधी : थोर समाजसुधारक, विचारवंत, शिक्षणतज्ज्ञ आणि निर्भीड पत्रकार गोपाळ गणेश आगरकर यांच्या १७० व्या जयंतीनिमित्त कराडमध्ये राज्यस्तरीय पुरस्कार वितरण सोहळ्याचे आयोजन करण्यात आले आहे. इंद्रधनू बिचारमंच फाउंडेशन आणि सद्गुरू गाडगे महाराज महाविद्यालय, कराड यांच्या संयुक्त विद्यमाने मंगळवार, दि. १४ जुलै रोजी सकाळी ९ वाजता विद्यानगर येथील सदूरू गाडगे महाराज महाविद्यालयात हा कार्यक्रम होणार असून, विविध क्षेत्रांत उल्लेखनीय कार्य करणाऱ्या मान्यवरांचा यावेळी सन्मान करण्यात येणार आहे. यंदाच्या सोहळ्यात पारधी मुक्ती आंदोलनाचे संस्थापक प्रकाश बायदंडे यांना समाजसुधारक गोपाळ गणेश आगरकर समाज परिवर्तन पुरस्कार प्रदान करण्यात येणार आहे. तसेच दैनिक प्रीतिसंगमचे संपादक शशिकांत पाटील यांना सुधारक गोपाळ गणेश आगरकर राज्यस्तरीय पत्रकारिता पुरस्कार देऊन गौरविण्यात येणार आहे.
याशिवाय अखिल भारतीय मराठी साहित्य परिषदेचे अध्यक्ष डॉ. शरद गौरे, ज्येष्ठ पत्रकार विजय जाधव, ज्ञान व माहिती संकलक प्रविण सरवदे, तसेच दुर्वा दळवी यांनाही राज्यस्तरीय पत्रकारिता पुरस्काराने सन्मानित केले जाणार आहे. या कार्यक्रमास ज्येष्ठ पत्रकार व राजकीय विश्लेषक विजय चोरमारे, रयत सहकारी साखर कारखान्याचे चेअरमन उदयसिंह पाटील उंडाळकर, सद्गुरू गाडगे महाराज महाविद्यालयाचे प्राचार्य चंद्रकांत खिलारे, उद्योजक रामकृष्ण चेताळ यांच्यासह विविध क्षेत्रांतील मान्यवर उपस्थित राहणार आहेत.
गोपाळ गणेश आगरकर यांचा जन्म १४ जुलै १८५६ रोजी कराड तालुक्यातील टेंभू येथे झाला, अत्यंत प्रतिकूल परिस्थितीतून शिक्षण घेत त्यांनी आधुनिक महाराष्ट्रातील समाजप्रबोधन, शिक्षण आणि पत्रकारितेच्या क्षेत्रात अमूल्य योगदान दिले. लोकमान्य टिळकांसमवेत त्यांनी केसरी वृत्तपत्राचे संपादक म्हणून काम पाहिले. पुढे सामाजिक सुधारणांचा पुरस्कार करण्यासाठी त्यांनी सुधारक हे स्वतंत्र वृत्तपत्र सुरू केले. सामाजिक समता, स्री-पुरुष समानता, विवेकवाद आणि विज्ञाननिष्ठ विचार यांचा त्यांनी सातत्याने पुरस्कार केला. बुद्धिप्रामाण्यवादाचे समर्थक असलेल्या आगरकरांनी डेक्कन एज्युकेशन सोसायटीच्या उभारणीतही महत्त्वाची भूमिका बजावली. महाराष्ट्रातील समाजसुधारकांच्या परंपरेत त्यांचे स्थान अत्यंत मानाचे मानले जाते. त्यांच्या जन्मभूमीत आयोजित करण्यात आलेला हा पुरस्कार सोहळा पैचारिक आणि सामाजिक क्षेत्रासाठी प्रेरणादायी ठरणार असल्याचा विश्वास आयोजकांनी व्यक्त केला आहे,
या कार्यक्रमास पत्रकार, साहित्यिक, सामाजिक कार्यकर्ते, विद्यार्थी, तसेच नागरिकांनी मोठ्या संख्येने उपस्थित राहावे, असे आवाहन इंद्रधनू विचारमंच फाउंडेशनचे विश्वस्त विकास भोसले, नितीन ढापरे, संदीप चेणने, प्रमोद तोडकर, अशोक मोहने आणि माणिक डोंगरे यांनी केले आहे.